Ukraynaya qarşı işğalçılıq müharibəsinin ildönümü ərəfəsində Moskvaya səfər edən Belarus Prezidenti Aleksandr Lukaşenkonun bəzi məsələlərdə Rusiya başçısına güzəştlər etdiyi məlum olub.
ABŞ Müharibə Araşdırmaları İnstitutunun(ISW) son hesabatında bu mövzuya xüsusi yer ayrılır. Hesabatda Lukaşenkonun Putinə yeni vədləri “gecikmiş güzəştlər” adlandırılır.
Məlum olduğu kimi, Lukaşenko Belarusda Rusiyanın “SU-25” hərbi təyyarələrinin istehsalına razılıq verib. Amerikalı mütəxəssislər hesab edirlər ki, bu təyyarələr onsuz da Ukraynaya qarşı müharibədə həlledici, həyati əhəmiyyətli rol oynamır. Ona görə də onların Belarusda istehsalı cəbhədəki vəziyyətə hər hansı ciddi təsir göstərməyəcək. Ancaq bununla yanaşı, Rusiya bu təyyarələrin istehsalını Belarusun boynuna qoymaqla, öz istehsal güclərini azad etmiş olur və həmin müəssisələr digər daha vacib hərbi məhsulların istehsalına yönəldilə bilər.
Hesabatda həmçinin bildirilir ki, Rusiya Belarusun hərbi sənayesini “udmağa” çalışır və Kreml bundan sonra müharibəni davam etdirmək və uzatmaq üçün Belarus sənayesinin imkanlarından daha geniş şəkildə istifadə etməyə çalışacaq.
Bütün bunlarla yanaşı, institut hesab edir ki, Lukaşenko artıq xeyli vaxt qazanmağa nail olub, onun Putinə yeni güzəştləri isə kifayət qədər gecikib və bunlar Rusiyaya hər hansı ciddi üstünlüklər qazandırmayacaq. Ən əsası isə odur ki, Lukaşenko Belarusu Ukraynaya qarşı birbaşa savaşdan yayındırmaq üçün manevrlər etməkdə davam edir.
C.Məmmədov
