Səhiyyə nazirinin müavini Rasim İsmayılov Nazirliyin sifarişi əsasında Tarif Şurasının dərman vasitələrinin qiymətlərinə yenidən baxacağını açıqlayıb.
Milli Məclisin iyulun 4-də keçirilən iclasında “Dərman vasitələri haqqında” Qanuna dəyişikliklə bağlı müzakirələrdə iştirak edən nazir müavini qeyd edib ki, sözügedən Qanuna dəyişikliyin məqsədi dərman vasitələrinin çeşidinin artırılması və əlçatanlığın təmin olunmasıdır.
Nazir müavininin fikirlərinə münasibət bildirən Milli Məclisin deputatı Vahid Əhmədov açıqlamasında deyib ki, əhalinin dərmanlara əlçatanlığını təmin etmək hər zaman diqqət mərkəzində olub:
“Nazir müavini hökumət üzvləri sırasında olan bir şəxsdir. Belə çıxışlarda bir az ehtiyatlı olmaq lazımdır. Söhbət dərman vasitələrindən gedirsə, bu, əhalinin əsas ehtiyac sahələrindəndir”.
Vahid Əhmədov bildirib ki, Milli Məclisdə dərman vasitələrinin qiymətinin yüksək olması məsələsi mütəmadi gündəmə gətirilir:
“Baş nazir də, hökumət də çalışır ki, qiymətləri tənzimləmək üçün müəyyən addımlar atsınlar, bu istiqamətdə işlər davam edir. Təklif etdik ki, qiymətlərə yuxarı hədd qoyulsun, dərmanlar o qiymətdən baha satılmasın, hərə öz istədiyi qiyməti qoymasın. Nazir isə deyir ki, bizi Türkiyəylə müqayisə etməsinlər, orada qazın qiyməti yüksəkdir, bizdə aşağıdır…
Ağılasığmaz misallar gətirirlər. Rəhbərə yaraşan fikirlər deyil, belə nümunələr çəkmək olmaz. Vətəndaşların sağlamlığı bizim üçün ən ümdə məsələlərdən biridir.
Cənab Prezident də dəfələrlə bu mövzuya toxunub. Qiymətlər yüksək olduğu üçün bəzi preparatlar əlçatan deyil. Hökumət qiymətlərin stabilləşməsi üzərində işləyir.
Hesab edirəm ki, müəyyən proseslərdə müdaxiləyə ehtiyac var”.
