Ermənistan rəhbərliyi ölkənin Rusiyadakı səfirinin dəyişdirilməsi məsələsini müzakirə edir. Bu barədə məlumatı “Hraparak” qəzeti yayıb.
Qəzet yazır ki, Ermənistanla Rusiya arasında münasibətlərin yenilənməsi zərurəti yaranıb və bunu anlayan tərəflər müəyyən addımlar atır: “Bunlardan birincisi səfirlərin dəyişdirilməsidir. Rusiya Ermənistan səfirindən narazıdır və bu məsələ ilk növbədə həll ediləcək. Səfir Vaqarşak Arutyunyanın əvəzlənməsi uzun müddətdir müzakirə olunur, lakin əsas problem namizəd seçimi ilə bağlı olub”.
Bildirilir ki, sözügedən posta bir neçə şəxsin namizədliyi müzakirə edilib. Ermənistan bu vəzifəyə ölkənin hakim “Vətəndaş müqaviləsi” partiyasından deputat Qurqen Arsenyanın namizədliyi üzərində dayanıb.
Xatırladaq ki, Ermənistanın Rusiyadakı səfiri Vaqarşak Arutyunyan bu vəzifəyə 2022-ci ilin yanvarında təyin edilib. Rusiyanın Ermənistandakı səfiri Sergey Kopırkin isə 2018-ci ilin aprelindən bu vəzifəni icra edir.
