Avropa İttifaqının Xarici siyasət və Təhlükəsizlik məsələləri üzrə Ali Nümayəndəsi Cozep Borrellin mətbuat katibi Peter Stano Avropa Sülh Mexanizmi çərçivəsində Aİ-nin Ermənistana necə kömək edə biləcəyi barədə danışıb.
Peter Stano “armenpress”ə müsahibəsində bildirib ki, Avropa İttifaqının maliyyə aləti olan Avropa Sülh Mexanizmi vasitəsilə ölkələrə dəstək verilir.
“Məsələn, biz Ukraynada bu mexanizmdən ukraynalı hərbçilərə ölkəni Rusiyanın qeyri-qanuni təcavüzündən müdafiə etməkdə kömək üçün istifadə edirik.
Lakin digər ölkələrdə biz Avropa Sülh Mexanizmindən sülh missiyalarımızı, müşahidə və ya monitorinq missiyalarımızı maliyyələşdirmək üçün istifadə edirik. Ermənistanda da bu belədir. Məsələn, hazırda Ermənistanda olan Aİ missiyası da Avropa Sülh Mexanizmi vasitəsilə maliyyələşdirilir. Ölkənin təhlükəsizliyini, sabitliyini və möhkəmliyini dəstəkləməyin müxtəlif yolları var. Beləliklə, üzv dövlətlər, Ermənistanı Avropa Sülh Mexanizmi vasitəsilə necə dəstəkləyə biləcəyimizə baxmaq imkanlarını öyrənmək istədiklərini söylədilər. Yenə də bu prosesin başlanğıcıdır. Beləliklə, biz necə dəstəkləmək, nə ilə dəstəkləmək yollarına baxırıq. Bu dəstəyin necə olacağı ilə bağlı hələlik konkret təklif yoxdur. Ancaq başqa ölkələrə nəzər saldıqda, biz nə edirik? Məsələn, Moldova ilə bağlı biz onların xarici müdaxilələrə qarşı durma qabiliyyətini yaxşılaşdırır, kiberhücumlarla mübarizə imkanlarını təkmilləşdirməyə kömək edirik. Beləliklə, bunlar Avropa Sülh Mexanizmi vasitəsilə dəstəklənən yollardır, lakin yenə də Ermənistanla bağlı hər şey mümkündür. Beləliklə, üzv dövlətlər Ermənistanı dəstəkləmək üçün Avropa Sülh Mexanizmindən istifadə etməyin ən yaxşı yolunun nə olacağı ilə bağlı müzakirələrə başlayırlar”, – Stano qeyd edib.
