Bu gün “2014 TN17” asteroidi Yer kürəsinə ən yaxın məsafədə olacaq.
“Xeberlenti.com” NASA-dan verilən məlumata istinadən xəbər verir ki, bu asteroidin diametri təxminən 165 metrdir və bu ölçüsü ilə Giza Böyük Piramidası ilə müqayisə edilə bilər.
Bildirilir ki, “2014 TN17” asteroidi “potensial təhlükəli obyekt” statusuna malik olmasına baxmayaraq, Yer kürəsi üçün heç bir toqquşma riski yoxdur.
“2014 TN17” asteroidi son üç əsrdə Yerə ən yaxın məsafədən keçəcək. Buna baxmayaraq, hətta ən yaxın nöqtədə belə, asteroidin planetimizdən olan məsafəsi 5,1 milyon kilometr olacaq ki, bu da Ayla Yer arasındakı məsafədən 13 dəfə çoxdur. Belə uzaq məsafəyə görə həvəskar teleskoplarla asteroidi müşahidə etmək mümkün olmayacaq.
NASA-nın təsnifatına görə, “2014 TN17” asteroidini “potensial təhlükəli” edən iki əsas səbəb var:
– Onun diametri 140 metrdən böyükdür.
– Yerə 7,5 milyon kilometrdən az məsafədə yaxınlaşır.
Lakin orbit hesablamalarına əsasən, bu asteroidin trayektoriyası planetimiz üçün real təhlükə yaratmır.
Növbəti diqqətçəkən astronomik hadisə 2029-cu ildə baş verəcək. 340 metr diametrə malik “Apofis” asteroidi həmin il Yer kürəsinə rekord dərəcədə – cəmi 31 000 kilometr məsafəyə qədər yaxınlaşacaq. Bununla belə, alimlərin hesablamalarına görə, “Apofis” də Yer üçün dərhal təhlükə yaratmır.
Bu cür yaxınlaşmalar alimlərə Yerə yaxın obyektlərin monitorinqinin əhəmiyyətini xatırladır və planetimizin mümkün gələcək toqquşmalardan qorunması üçün yeni strategiyaların hazırlanmasına töhfə verir.
“2014 TN17” asteroidi son üç əsrdə Yerə ən yaxın məsafədən keçəcək
