Son günlər paytaxt Bakıda yollarda görməyə vərdiş etdiyimiz nəqliyyat sıxlığı və tıxaclar nəzərəçarpacaq dərəcədə azalıb.
Əvvəl belə hallar yalnız səhər və axşam saatlarında, o da bəzi əsas küçə və prospektlərdə qeydə alınır, günün qalan saatında isə şəhərdə adətən avtomobil sıxlığı müşahidə olunur.
Maraqlıdır, Bakıda son günlər yolların boşalmasının və tıxacların azalmasının əsas səbəbi nədir? İnsanlar fərqli nəqliyyat vasitələrinə üstünlük verməyə başlayıb, yoxsa artıq nəqliyyatdan istifadəni azaldıblar?
Mövzu ilə bağlı “Xeberlenti.com”-a açıqlama verən nəqliyyat eksperti Eldəniz Cəfərov bildirib ki, bu əsasən Novruz bayramı tətili ilə əlaqədardır.
“Bu, birbaşa tətillər ilə bağlıdır. Bayram tətillərində insanlarımızın bir qismi bölgələrə səfər edir, digər qismi isə Bakıda qalsalar da, avtomobildən istifadə etmirlər. Bu, olduqca xoş bir haldır. Şəhərin mərkəzini avtomobilsiz, tıxacsız görmək xoş bir mənzərədir.
Bakı təkcə paytaxt deyil, eyni zamanda sənaye şəhəridir. Atmosfer havasının təmiz qalması üçün çalışmaq lazımdır. Ancaq avtomobillərin intensiv hərəkəti bu planları pozur. Məhz avtomobillər şəhər mərkəzinə doğru hərəkət etdikcə sıxlıq olur.
Tıxaclar zamanı avtomobillərdən havaya buraxılan qazların miqdarı artır və bu, ekoloji problemlərə gətirib çıxarır. Avtomobillər tıxacda qaldıqca mühərrik işləməyə davam edir və atmosferə yüksək miqdarda karbon qazı və digər qələvi qazlar, zərərli maddələr yayılır. Bu da insan sağlamlığına ciddi ziyan vurur”.
O qeyd edib ki, bu gün Azərbaycanda avtomobil parkının yenilənməsi üçün müəyyən işlər görülür:
“Avtomobil parkının yenilənməsi üçün bir sıra addımlar atılıb və atılır. Bu addımlardan biri odur ki, ölkəyə idxal edilən avtomobillər “Euro-4” standartına cavab verməlidir və yaşı 10 ildən çox olmamalıdır. Burada qismən köhnə avtomobil ola bilər.
Bundan başqa “Euro-4” sistemindən “Euro-5” standartına keçək daha yaxşı olar. Artıq ölkəmizdə avtomobillərin utilizasiya proqramı işə salınıb. Hazırda vətəndaş köhnə avtomobilini verib onun müqabilində ya pul, ya da valyuta alır”.
Eldəniz Cəfərov utilizasiya proqramının genişləndirilməsinin vacib olduğunu bildirib:
“Utilizasiya məsələsində də biz bir qədər genişlənməyə ehtiyac var. Hazırda avtomobilini utilizasiyaya verən vətəndaşa cəmi 1500 manat pul verilir. Ancaq bu məbləğin 3-4 dəfə artırılması daha çox insanın köhnə avtomobillərdən imtina etməsinə səbəb olar.
Bildirim ki, utilizasiyaya hər kəs qoşula bilər. İstənilən Azərbaycan vətəndaşı öz avtomobilini könüllü olaraq utilizasiyaya verə bilər. Bunun üçün “Təmiz Şəhər” Açıq Səhmdar Cəmiyyəti onlayn qaydada avtomobilin utilizasiyası ilə bağlı bir portal yaradıb.
Vətəndaş həmin portala daxil olur. Öz məlumatlarını və avtomobilin məlumatlarını daxil edir. Sonra avtomobilin dövlət yol polisində uçotdan çıxarılmasını təmin edir. Ondan sonra utilizatora yaxınlaşaraq avtomobilini utilizasiyaya verir.
Məbləği vətəndaşa utilizasiya verir. Minik avtomobilləri üçün qiymət standart 1500 manat təyin edilib. Bizim də təklifimiz odur ki, standart qiymət olmasın. Dəyişən qiymət olsun və həmin qiymət bir az yüksəldilsin.
Belə etsək, insanlar daha çox həvəs göstərər və biz də həmin o köhnə avtomobillərdən qurtularıq. Həmçinin, şəhərin mərkəzində sıxlıqdan azad olarıq.
Yəni bu getdikcə bir ekoloji və sosial-iqtisadi problemə çevrilə bilər. Köhnə maşınların mərkəzə daxil olmasının qarşısı alınmalıdır”.
