Türkiyədə CHP-nin prezidentliyə namizədi və İstanbul Böyükşəhər Bələdiyyə sədri Əkrəm İmamoğlunun saxlanılması ilə bağlı baş verən etirazlarda iştirak edən gənclərin həbsi sənət aləmində geniş reaksiyaya səbəb olub.
“Xeberlenti.com”Türkiyə mətbuatına istinadən xəbər verir ki, sənətçilər sosial media hesablarında ardıcıl paylaşımlar edərək gənclərin konstitusiya hüquqlarından istifadə etdiyini vurğulayıblar.
Aktrisa Beren Saat sosial media hesabında bu məsələyə toxunaraq bildirib: “Qapıda ağlayan anaları görəndə ürəyim parçalanır. Onlar Türkiyənin ən yaxşı universitetlərində təhsil alan gənclərin ailələridir. Ölkəmiz tərəqqi edəcəksə, bu gənclərin sayəsində olacaq. Xahiş edirəm, onları incitməyin, tələblərinə qulaq asın, azad olsunlar”.
CHP lideri Özgür Özəlin çağırışı ilə Maltepedə keçirilən mitinqdə də bu mövzu əsas gündəm olub. Aktyorlar Engin Öztürk, Hazal Kaya, Demet Akbağ, Seda Bakan, Qamze Erçel, Aslı İnandık, Metin Akdülger, Çağla Şikel, Mehmet Günsur, Bige Önal, Meriç Aral, Burcu Esmersoy, Selen Öztürk, eləcə də məşhur müğənnilər Mustafa Sandal, Ceylan Ertem, Zeynep Bastıq, Bengü, Gökhan Özoğuz, Mabel Matiz, Can Bonomo və bir çox başqa sənətçilər mitinqin dron görüntülərini “2,2 milyon iştirakçı” başlığı ilə paylaşıblar.
Aktrisa Nurgül Yeşilçay isə bu məsələyə sərt reaksiya verərək sual edib: “Bu balaca uşaqlar həbsxanada nə edirlər? Nə edirsiniz? Bu mübarək gündə anaların qarğışını almayın, o uşaqları həbsxanadan çıxarın”.
Sənətçi Sabahat Akkiraz da paylaşımında belə bir müqayisə aparıb: “Sivasda insanları yandıranlar imza ilə sərbəst buraxıldı! Polisləri öldürənlər sərbəst buraxıldı! Amma Mahir Polat və gənclərimiz həbsdədir! Seçki qutusu gələndə bunu unutmayaq”.
Müğənni Gülben Ergen isə bu vəziyyətə münasibət bildirərək yazıb: “Tələbələri buraxın desəm, məni də saxlayacaqlar? Mənim uşaqlarım yaşında olan gənclərdir. Siz hardasınız? Mən ədalət və demokratiya tərəfdarıyam!”
Aktyor Kıvanç Tatlıtuğ İnstaqram hesabında “Anasının, atasının əlini öpə bilməyən gənclər həbsxanada ikən mənim bayramım yoxdur” paylaşımını edib.
Sənətçi Demet Akbağ sosial media hesabından “Ən gözəl bayram sevinclə gülümsəyən uşaqların, azad şəkildə gələcəyə ümidlə baxan gənclərlə qeyd olunur. Bayramı bayram edən uşaqların gülüşü, gənclərin azad arzularıdır. Bayramınız mübarək”.
Aktrisa Hazal Kaya da sosial media hesabında qısa mesaj paylaşıb: “Uşaqları buraxın!”
