Vətən müharibələri tariximizin ən şanlı səhifələrindən biridir. Bu tarixin qəhrəmanları sırasında Birinci Qarabağ müharibəsinin qazisi, Respublika Qayğı Cəmiyyətinin Abşeron şöbəsinin sədri Simarə Süleymanova xüsusi yer tutur. O, yalnız döyüş meydanında deyil, həm də cəmiyyətimizdə sosial dəstək və xeyriyyəçilik fəaliyyəti ilə seçilən bir şəxsiyyətdir.
Simarə Süleymanova gənclik illərindən etibarən Vətən sevgisi və xalqına xidməti öz həyatının əsas prinsipləri kimi qəbul edib. Birinci Qarabağ müharibəsində göstərdiyi igidlik, düşmən qarşısında sərgilədiyi əzmkarlıq onun döyüş yolunu şərəfləndirən əsas amillərdir. Müharibədən sonra sağlamlığında yaranan çətinliklərə baxmayaraq, o, vətənpərvərlik missiyasını davam etdirmiş, qazilərin, şəhid ailələrinin və aztəminatlı insanların sosial müdafiəsi istiqamətində yorulmadan çalışmışdır.
Hazırda Respublika Qayğı Cəmiyyətinin Abşeron şöbəsinin sədri kimi Simarə Süleymanova müxtəlif sosial layihələrə rəhbərlik edir. Onun əsas məqsədi şəhid ailələrinə, qazilərə və aztəminatlı ailələrə dəstək olmaq, onların problemlərini ictimaiyyətin diqqətinə çatdırmaqdır. O, bu yolda yalnız rəsmi qurumlarla deyil, həm də könüllü xeyriyyəçilərlə sıx əməkdaşlıq edir.
Simarə xanımın fəaliyyəti təkcə sosial layihələrlə məhdudlaşmır. O, gənc nəslin vətənpərvərlik ruhunda tərbiyə olunmasına da xüsusi önəm verir. Keçirilən tədbirlərdə, görüşlərdə, seminarlarda iştirak edərək öz döyüş xatirələrini bölüşür, gənclərə vətən sevgisini aşılayır.
Simarə Süleymanova təkcə bir döyüşçü, bir qazi deyil, o, həm də mərhəmətli bir ana, sədaqətli bir dost və cəmiyyət üçün dəyərli bir insandır. Onun fəaliyyəti Azərbaycan xalqının birlik və həmrəylik ruhunu daha da möhkəmləndirir. Belə fədakar insanların varlığı sayəsində Vətən sevgisi daim yaşar və gələcək nəsillərə ötürülər.
Ona möhkəm can sağlığı, fəaliyyətində uğurlar və yeni nailiyyətlər arzulayırıq!
