Yay aylarında artan temperatur səbəbindən tərləmə bir çox insan üçün narahatlıq yaradır. Xüsusilə günəşli saatlarda bədən istiliyinin yüksəlməsi tər vəzilərinin daha aktiv işləməsinə səbəb olur. Bununla belə, bəzi sadə, lakin təsirli vərdişlər sayəsində tərləməni azaltmaq mümkündür.
“Xeberlenti.com”un məlumatına görə, tərləmənin qarşısını almaq üçün aşağıdakı üsulları tətbiq etmək tövsiyə olunur:
1. Uyğun geyim seçimi
Sintetik parçalar bədənin hava almasını çətinləşdirərək tərləməni artırır. Bunun əvəzinə pambıq və ya kətan kimi təbii, nəfəs alan materiallardan hazırlanmış geyimlərə üstünlük verin. Açıq rəngli paltarlar günəş şüalarını əks etdirdiyi üçün bədən istiliyinin artmasının qarşısını alır.
2. İsti duş
Səhər saatlarında qəbul edilən isti duş bədən istiliyini tənzimləyir və gün ərzində daha az tərləməyə kömək edir. Həmçinin, antibakterial sabunlardan istifadə xoşagəlməz qoxuların qarşısını almaqda faydalıdır.
3. Kifayət qədər su qəbulu
Bədənin su balansını qorumaq tər vəzilərinin fəaliyyətini tənzimləyir. Yay mövsümündə gündə 2–2,5 litr su içmək tərləməni azaltmaqla yanaşı, ümumi sağlamlığa da müsbət təsir göstərir.
4. Qidalanmaya diqqət
Çox ədviyyatlı, yağlı və isti yeməklər bədən istiliyini artıraraq tərləməni çoxaldır. Bu səbəbdən yay aylarında salat, qatıq, təzə tərəvəz və meyvə kimi yüngül və soyuducu qidalara üstünlük verin.
Bu sadə tədbirlər həm gündəlik rahatlığınızı təmin edəcək, həm də yay fəslində özünüzü daha rahat hiss etməyinizə kömək olacaq.
Kəmalə Vəliyeva
