Ukrayna Prezidenti Volodimir Zelenski Xarkov vilayətinin Kupyansk şəhərindən videomüraciət yayımlayıb.
O, teleqram kanalında paylaşım edərək, həmin istiqamətdə mövqelərin möhkəm şəkildə qorunduğunu bildirib.
“Bu gün Kupyansk istiqamətində, Ukrayna üçün bütün tapşırıqları yerinə yetirən əsgərlərimizin yanındayam. Ruslar Kupyansk barədə çox danışırdılar, amma reallıq ortadadır. Bölmələrimizə baş çəkib onları təbrik etdim. Burada döyüşən hər kəsə təşəkkür edirəm”, – deyə Zelenski bildirib.
Xatırladaq ki, ötən ay Rusiya Silahlı Qüvvələrinin Baş Qərargah rəisi Valeri Gerasimov son iclasda Prezident Vladimir Putinə şəhərin tamamilə Rusiya ordusunun nəzarətində olduğunu məruzə etmişdi.
Zelenskinin sözügedən paylaşımı isə bu iddiaları təkzib edir. Rusiya mediası tərəfindən Ukrayna liderininin həmin videonu daha əvvəl çəkdiyi iddia olunur.
