“Azərbaycan Hava Yolları”-na məxsus təyyarənin ötən il dekabrın 25-də Qroznı səmasında Rusiya Hava Hücumundan müdafiə qüvvələrinin atdığı raketlə zədələnərək Qazaxıstanın Aktau şəhəri yaxınlığında qəzaya uğramasının bir ili tamam olur.
Faciənin ildönümü və qəza zamanı həlak olanların xatirəsinə ehtiram əlaməti kimi AZAL və “Azərpoçt”un birgə təşəbbüsü ilə poçt markası buraxılıb. Təqdimat mərasimi Azərbaycan Tarixi Muzeyində keçirilib. Markanın nümunəsi muzeydə xüsusi ekspozisiya kimi nümayiş etdirilib. Markanın dizaynında yer alan sonsuzluq rəmzi faciəli hadisənin, onun qurbanlarının və milli tariximizdə iz qoymuş heyət üzvlərinin qəhrəmanlığının yaddaşlarda daim yaşadılmasını ifadə edir. Layihə faciə qurbanlarının xatirəsinə ehtiramı ifadə etməklə yanaşı, ekstremal şəraitdə peşəkar və fədakar fəaliyyəti nəticəsində 29 nəfərin həyatını xilas etmiş heyət üzvlərinin qəhrəmanlığını ön plana çıxarır.
Təqdimat mərasimində AZAL və “Azərpoçt”-un rəsmi şəxsləri ilə yanaşı qəzada sağ qalan bələdçilər – Aydan Rəhimli və Zülfüqar Əsədov da iştirak edib. Xatirə poçt markalarının satışından əldə edilən bütün vəsait “YAŞAT” Fonduna ianə olunacaq.
