Kral III Çarlz Milad Günü ilə bağlı ənənəvi müraciətində bayram günlərində britaniyalıları rəqəmsal detoks etməyə, ailə, dostlar, qonşularla ünsiyyətə daha çox vaxt ayırmağa çağırıb.
O bildirib ki, müasir həyat getdikcə daha sürətlə dövr edir və bu proses xüsusilə gənclər üçün ciddi rəqəmsal yüklənmə yaradır. Kralın sözlərinə görə, sosial mediadan bir qədər uzaqlaşmaq, ətrafımızdakı insanları daha yaxından tanımaq və yeni dostluqlar qurmaq daxili rahatlıq üçün vacibdir.
Bu, hakimiyyəti dövründə III Çarlzın Milad müraciətini iqamətgahından kənarda lentə aldığı ikinci haldır. Bu ilki çıxış Vestminster Abbatlığında yerləşən Kral ailəsinin minillik mənəvi mərkəzi hesab olunan – 15 Kral və Kraliçanın məzarının yerləşdiyi VII Henrix kapellasında çəkilib.
